ANDIJON DAVLAT CHET TILLARI INSTITUTINING 60 YILLIK YUBILEYI KATTA SHUKUH BILAN NISHONLANDI

Andijon davlat chet tillari institutining 60 yillik yubileyiga bag‘ishlangan tantanali tadbir yuqori saviyada, ko‘tarinki ruh va unutilmas taassurotlar ostida bo‘lib o‘tdi.

Oltmish yillik tarix davomida institut nafaqat minglab malakali mutaxassislarni tarbiyalab, jamiyat taraqqiyotiga munosib hissa qo‘shdi, balki xorijiy tillar ta’limi, ilm-fan va xalqaro hamkorlik yo‘nalishlarida ham o‘zining mustahkam o‘rnini shakllantirdi. Bugun ushbu dargoh mamlakatimizdagi nufuzli oliy ta’lim muassasalaridan biri sifatida e’tirof etilib, xalqaro maydondagi aloqalarini tobora kengaytirib bormoqda.

Yubiley tadbiri davomida institutning boy tarixi, bosib o‘tgan sharafli yo‘li, erishilgan yutuqlari va istiqboldagi ulkan rejalari haqida so‘z yuritildi. Faxriy ustozlar, professor-o‘qituvchilar, bitiruvchilar, talabalar hamda xorijiy mehmonlar ishtirokida o‘tgan ushbu bayram barchaga iliq xotiralar ulashdi.

Tadbir davomida kuy-qo‘shiqlar, badiiy chiqishlar, sahna ko‘rinishlari va samimiy tabriklar bayramga yanada o‘zgacha fayz bag‘ishladi. Har bir chiqish institutning boy an’analari, ilm-ma’rifatga sadoqati va kelajakka bo‘lgan yuksak ishonchini o‘zida aks ettirdi.

60 yil — bu shunchaki raqam emas. Bu fidokor ustozlar mehnati, minglab bitiruvchilarning muvaffaqiyati, ilm-fan yo‘lida erishilgan yutuqlar va yorqin kelajak sari qo‘yilgan mustahkam poydevordir.

Andijon davlat chet tillari instituti jamoasini ushbu qutlug‘ sana bilan yana bir bor muborakbod etamiz va kelgusida ham yangi zafarlar, ulkan yutuqlar hamda xalqaro maydondagi muvaffaqiyatlar tilaymiz!

Andijon davlat chet tillari instituti axborot xizmati