Andijon davlat chet tillari instituti rektori D.A.Rustamov boshchiligidagi delegatsiyasi Rossiya Federatsiyasiga amalga oshirilgan xizmat safari davomida I.A.Gertsen nomidagi Rossiya davlat pedagogika universiteti bilan samarali muzokaralar o‘tkazdi. Muzokaralar natijasida 2026-yilda rejalashtirilgan “Yozgi oromgoh — 2026” loyihasi hamda bir qator qo‘shma ta’lim-ilmiy tashabbuslar yuzasidan asosiy kelishuvlarga erishildi.
Asosiy kelishuvlar va loyihaning maqsadi:
“Yozgi oromgoh — 2026”
— Loyihaning maqsadi — talabalarning xalqaro muloqot va yetakchilik ko‘nikmalarini shakllantirish, madaniy almashinuvni yo‘lga qo‘yish hamda til o‘rganish uchun intensiv platforma yaratish. Gertsen universiteti va Andijon davlat chet tillari instituti talabalari birgalikda o‘quv-amaliy sessiyalar, ijodiy va OTMlararo jamoaviy loyihalar, madaniy dasturlar va tarmoq faoliyatida ishtirok etadi;
Loyiha formatida seminarlar, treninglar, madaniy-sport tadbirlari va ta’limiy mashg‘ulotlar nazarda tutilmoqda. Ishtirokchilar uchun amaliy kurslar va interaktiv dasturlar tashkil etiladi;
Talabalar almashinuvi va stajirovkalar
— Ta’lim modullari, qisqa muddatli akademik almashinuvlar va stajirovkalar yo‘lga qo‘yilishi kelishildi. Bu dasturlar talabalar uchun xorijiy tajriba orttirish, malaka oshirish va til muhitida o‘qish imkoniyatini taqdim etadi.
Ilmiy-tadqiqot va ta’limiy hamkorlik
— Ikki tomonlama ilmiy izlanishlar, qo‘shma maqolalar, konferensiyalar va grant loyihalarida hamkorlik yangi ustuvor yo‘nalish sifatida belgilandi. Ular ta’lim metodikasi, tilshunoslik, madaniy aloqa va pedagogik innovatsiyalar sohalarini qamrab oladi.
Professor-o‘qituvchilar mobilligi va malaka oshirish
— O‘qituvchilar uchun qisqa pedagogik stajirovkalar, master-klasslar va ilmiy konsultatsiyalar tashkil etilishi rejalashtirilmoqda.
Institut rahbariyati xalqaro hamkorlikni strategik yo‘nalish sifatida rivojlantirishni davom ettiradi va ushbu loyihalarni amalga oshirish orqali talabalar hamda professor-o‘qituvchilarga keng imkoniyatlar yaratishga sodiqdir.
Andijon davlat chet tillari instituti axborot xizmati
