MAGISTRANTLAR DISSERTATSIYA HIMOYASI DAVOM ETMOQDA

Andijon davlat chet tillari institutida magistratura bosqichi talabalarining yakuniy dissertatsiya himoyalari joriy yilning 16-iyunidan boshlab boshlangan bo‘lsa, bugun — 17-iyun kuni ham ushbu jarayon izchil davom ettirildi.

Himoya jarayonida har bir magistrant o‘z ilmiy izlanishlari natijasida tayyorlagan dissertatsiya mavzusi yuzasidan taqdimot qildi. Ular dissertatsiya ishida ko‘tarilgan muammo, tadqiqot metodlari, asosiy natijalar hamda ularning amaliy ahamiyati haqida atroflicha ma’lumot berdilar. Magistrantlar o‘z chiqishlarida ilmiy tahlil, mantiqiy fikrlash va mustaqil xulosa qilish qobiliyatlarini namoyon etdilar.

Davlat attestatsiyasi komissiyasi a’zolari esa har bir dissertatsiyani baholashda ilmiy yangilik, dolzarblik, amaliyotga tatbiq etish imkoniyati, adabiyotlar bilan ishlash madaniyati va taqdimot uslubiga alohida e’tibor qaratdilar. Tinglovchilarning savollariga berilgan asosli va puxta javoblar ularning mavzuni chuqur o‘zlashtirganini ko‘rsatdi.

Bugungi himoyalarda ayniqsa tarjimashunoslik, xorijiy tillarni o‘qitish metodikasi, lingvistika va madaniyatlararo muloqot yo‘nalishlaridagi mavzular muhokama qilindi. Talabalar tomonidan keltirilgan ilmiy g‘oyalar, ilgari surilgan taklif va tavsiyalar esa mutaxassislar tomonidan ijobiy baholandi.

Mazkur jarayon institutda oliy ta’limning sifatli amalga oshirilayotganidan dalolat beribgina qolmay, yoshlarimizning ilm-fan, tadqiqot va amaliy faoliyatga bo‘lgan qiziqishi kundan-kunga ortib borayotganini ham ko‘rsatmoqda. Magistrlik darajasiga erishish yo‘lidagi bu so‘nggi bosqich — ular uchun nafaqat ta’limning yakuniy nuqtasi, balki ilmiy faoliyat sari tashlangan ishonchli qadamlardan biridir.