KUTILMAGAN TUHFA: MIRZABEK XOLMEDOV TALABALAR BILAN UCHRASHDI

​Andijon davlat chet tillari institutida «Payshanba — yoshlar kuni» loyihasi doirasida O‘zbekistonda xizmat ko‘rsatgan artist, ko‘plab qalblar ardog‘idagi so‘z ustasi Mirzabek Xolmedov bilan ijodiy uchrashuv bo‘lib o‘tdi.
​
 Institut faollar zalida o‘tkazilgan uchrashuv ko‘tarinki ruhda va samimiy muloqot tarzida o‘tdi. Mirzabek Xolmedov o‘zining ko‘p yillik boy ijodiy tajribasi, san’at olamidagi mashaqqatli yo‘li hamda muvaffaqiyat sirlari haqida hayotiy misollar bilan so‘zlab berdi. San’atkor tomonidan ijro etilgan hajviy chiqishlar va falsafiy mushohadalar talabalarga ham kulgu, ham chuqur ma’naviy oziqa ulashdi.
​
 Tadbir davomida talaba-yoshlar o‘zlarini qiziqtirgan savollar, xususan, notiqlik san’ati, sahna madaniyati va hayotiy muvozanatni saqlash borasidagi mulohazalari bilan san’atkorga yuzlandilar. Uchrashuv shunchaki ijodiy kecha emas, balki ustoz-shogird an’analarini mustahkamlovchi jonli mahorat darsiga aylanib ketdi.
​
 Mirzabek Xolmedov yoshlarning ilmga bo‘lgan ishtiyoqi va oliygohdagi o‘ziga xos kreativ muhitni alohida e’tirof etib, talabalarga kelajakdagi faoliyatlarida muvaffaqiyatlar tiladi. «Yoshlar kuni» doirasidagi bunday uchrashuvlar talabalarning darsdan bo‘sh vaqtlarini mazmunli o‘tkazish hamda ularning ijtimoiy faolligini oshirishda muhim platforma bo‘lib xizmat qilmoqda.

 Andijon davlat chet tillari instituti axborot xizmati