XALQARO HAMKORLIK: ADCHTI DELEGATSIYASI TOJIKISTONDA BO‘LDI

 ​Andijon davlat chet tillari institutining xalqaro aloqalarini kengaytirish va qo‘shni davlatlar oliy ta’lim muassasalari bilan tajriba almashish maqsadida institut delegatsiyasi amaliy tashrif bilan Tojikiston Respublikasida bo‘ldi.
​Roman-german va slavyan tillari fakulteti Umumiy va qiyosiy tilshunoslik kafedrasi mudiri B.Abdullayev boshchiligidagi vakillarimiz Xo‘jand davlat xalqaro instituti rahbariyati tomonidan iliq kutib olindi.
​
 Tashrif davomida delegatsiya a’zolari Tojikistonning qadimiy va milliy bayramlaridan biri — Navro‘z ayyomidan 50 kun avval nishonlanadigan «Sada» bayrami tantanalarida ishtirok etdilar. Bahor darakchisi hisoblangan ushbu bayram tadbirlari doirasida o‘zbek va tojik xalqlarining mushtarak qadriyatlari yana bir bor e’tirof etildi.
​
 Amaliy tashrifning asosiy qismi ikki oliy ta’lim muassasasi o‘rtasidagi ilmiy-pedagogik hamkorlik masalalariga bag‘ishlandi. Muzokaralar yakunida quyidagi kelishuvlarga erishildi va hamkorlik memorandumi imzolandi:

 Professor-o‘qituvchilar va talabalar almashinuvini yo‘lga qo‘yish;
 Umumiy va qiyosiy tilshunoslik sohasida qo‘shma ilmiy loyihalarni amalga oshirish;
 Xalqaro konferensiya va seminarlarni hamkorlikda tashkil etish.

​ Ushbu kelishuv ikki institut o‘rtasidagi do‘stona aloqalarni yangi bosqichga olib chiqish bilan birga, mintaqaviy ta’lim sifatini oshirishga ham xizmat qiladi.

Andijon davlat chet tillari instituti axborot xizmati