FORUM NATIJASI: YANA BIR XORIJIY UNIVERSITET BILAN HAMKORLIK

 Bugun Toshkent shahrida o‘tkazilgan O‘zbekiston–Xitoy ikkinchi ta’lim forumida Andijon davlat chet tillari instituti rektori, professor Dilshodbek Abduvahidovich Rustamov ham faol ishtirok etdi. Forumning ikkinchi qismida institut va Xitoy Xalq Respublikasining Kashi universiteti o‘rtasida xalqaro hamkorlik bo‘yicha shartnoma imzolandi.

 Ushbu shartnoma ikki oliy ta’lim muassasasi o‘rtasida ta’lim, ilmiy-tadqiqot va madaniyatlararo aloqalarni kengaytirish yo‘nalishida hamkorlikni yo‘lga qo‘yishni nazarda tutadi. Xususan, kelishuvning asosiy yo‘nalishlari quyidagilarni o‘z ichiga olishi kutiladi:

 Talaba va o‘qituvchilar almashinuvi — qisqa muddatli mobil dasturlar, stajirovkalar va konferensiyalar orqali tajriba almashish;

 Qo‘shma ta’lim loyihalari va kurslar — zamonaviy o‘quv modul va metodik materiallarni ishlab chiqish hamda ikki tomonlama ta’lim dasturlari imkoniyatlarini o‘rganish;

 Ilmiy hamkorlik va tadqiqotlar — birgalikda grantlar, ilmiy loyihalar va maqolalar yaratish;

 O‘qituvchilar malakasini oshirish — pedagogik mahorat markazlari bilan hamkorlikda o‘qituvchilar uchun trening va tajriba almashinuvi;

 Til va madaniyatlararo aloqa — xitoy tili va madaniyati bo‘yicha dasturlar, hamda ko‘p tillik kompetensiyalarni rivojlantirish.

 Kashi universiteti bilan imzolangan shartnoma Andijon davlat chet tillari instituti uchun nafaqat xalqaro hamkorlikni kengaytirish, balki milliy ta’lim strategiyasini amaliy yo‘nalishlarda mustahkamlash, talabalarga yuksak sifatli ta’lim va jahon darajasidagi imkoniyatlar yaratish yo‘lida muhim qadamdir.

Andijon davlat chet tillari instituti axborot xizmati