Andijon davlat chet tillari institutida 8-oktabr 2025-yil kuni institut va Rossiyaning A.S.Pushkin nomidagi Rus tili davlat universiteti bilan hamkorlik doirasida rejalashtirilgan xalqaro ilmiy forum o‘z ishini muvaffaqiyatli yakunladi. Tadbirga Rossiyadan taklif qilingan 15 nafar yetakchi olim hamda institutning professor-o‘qituvchilari va iqtidorli talabalari keng miqyosda jalb etildi.
Forum dasturi mehmonlarni tantanali kutib olish va ochilish marosimi bilan boshlandi. Tadbirni institut Ilmiy ishlar va innovatsiyalar boʻyicha prorektori Kurbanov Muzaffar Abdumutallibovich ochib berdi va mehmonlarni samimiy kutib olib, xalqaro hamkorlikni mustahkamlash, ilmiy salohiyatni oshirish hamda talabalarning amaliy ilmiy faoliyatini rag‘batlantirish zarurligini taʼkidladi. Muzaffar Abdumutallibovich, shuningdek, ikki tomonlama aloqalar natijasida amalga oshirilishi lozim bo‘lgan bir qator ustuvor yo‘nalishlarni belgilab o‘tdi.
Forumda filologiya (tilshunoslik), adabiyotshunoslik, biologiya, kimyo, falsafa, fizika-matematika, maktabgacha taʼlim, qishloq xo‘jaligi va ishlab chiqarish texnologiyalari kabi ko‘p tarmoqli mavzular bo‘yicha maʼruzalar, plenary sessiyalar va davra suhbatlari tashkil etildi. Xususan, tilshunoslik sohasida professor V.I.Karasik, adabiyotshunoslik bo‘yicha professor E.M.Afanasyeva, biologiya mutaxassisi professor Ye.V.Pushina, kimyo bo‘yicha professor A.L.Gushin, falsafa yo‘nalishi professor Ye.A.Dergacheva kabi nufuzli olimlar o‘z taqdimotlari bilan ishtirok etdi.
Tadbir davomida ilmiy maʼruzalar bilan bir qatorda amaliy-masterklasslar, yosh olimlar uchun poster sessiyalari va talaba-ilmiy jamoalarning ijodiy himoyalari ham o‘tkazildi. Ishtirokchilar zamonaviy tadqiqot metodologiyalari, ilmiy hamkorlik va grantlar uchun ariza tayyorlash bo‘yicha metodik jihatlarni muhokama qildilar, hamda o‘zaro tajriba almashish imkoniyatlarini ko‘rib chiqdilar.
Forumning muhim jihatlaridan biri — institut va tashrif buyurgan olimlar o‘rtasida talaba almashinuvlari, qo‘shma tadqiqotlar, qisqa muddatli stajirovkalar va birgalikda o‘quv-amaliy dasturlarni tashkil etish bo‘yicha istiqbolli takliflar muhokama etilgani bo‘ldi. Ishtirokchilar ilmiy nashrlar, xalqaro anjumanlar va qo‘shma grant loyihalarini amalga oshirish masalasida hamkorlikni kuchaytirish zarurligini qayd etdilar.
Yakunda forum ishtirokchilari tomonidan ilmiy hamkorlikni chuqurlashtirish, o‘quv jarayonlariga xalqaro tajribani keng joriy etish va iqtidorli talabalarni ilmiy-amaliy ishga faol jalb etish bo‘yicha tavsiyalar qabul qilindi. Bundan tashqari, kelgusida aniq hamkorlik shartlarini ishlab chiqish uchun ishchi guruhlar tuzilishi va navbatdagi almashinuvlar rejalashtirilishi belgilandi.
Forum Andijon davlat chet tillari institutining xalqaro maydondagi aloqalarini kengaytirish, ilmiy salohiyatini oshirish va talabalarga amaliy ilmiy imkoniyatlar yaratish borasidagi muhim qadam bo‘ldi. Tadbir ishtirokchilari forumni yuqori baholab, hamkorlikni davom ettirish istagini bildirishdi.
Andijon davlat chet tillari instituti axborot xizmati
