REKTOR SOVRINI UCHUN INGLIZ TILI FAN OLIMPIADASINING OLTINKOʻL TUMANI BOSQICHI BOʻLIB OʻTDI

Bugun – 19.04.2024-yil kuni Andijon viloyati Oltinkoʻl tumani 42-umumiy oʻrta ta’lim maktabida ham Andijon davlat chet tillari instituti rektori filologiya fanlari doktori (DSc), professor Dilshodbek Abduvahidovich Rustamov sovrini uchun tumandagi 9 va 11-sinf oʻquvchilari oʻrtasida Ingliz tili fan olimpiadasining tuman bosqichi boʻlib oʻtdi.

Institutning Roman-german va slavyan tillari fakulteti dekani M.Pazilov hamda Umumiy va qiyosiy tilshunoslik kafedrasi mas’ulligida tashkil qilingan ushbu olimpiada Oʻzbekiston Respublikasi davlat madhiyasi ijrosi bilan boshlandi. Shundan soʻng institutning Oʻquv ishlari boʻyicha prorektori E.E.Kurbanov ochilish nutqini soʻzladi, so’ngra dekan M.Pazilov, kafedra mudiri Z.Kobilovalar ishtirokchilar va ularning ustozlariga olimpiadani oʻtkazishdan koʻzlangan maqsad haqida fikrlar bildirdi.

Shundan soʻng barchaga omad tilab, ishtirokchilar guruhlar kesimida xonalarga taklif qilindi.

Olimpiadaning gʻolib va sovrindorlari aniqlanib, ularni institutning prorektor E.Kurbanov tabrikladi va ilm olishdan toʻxtamaslikka targʻib qilib, mas’ullar hamrohligida maxsus diplom va esdalik sovgʻalarini tantanali ravishda topshirdi. Endi ular viloyat bosqichida asosiy sovrin uchun bellashadilar.